Fonoteca de la Música Tradicional Purhépecha

Pirekua ka kústakua patsarakua

Na enka ánchekorheta uénakorheka
Pirekua ka kústakua patsarakua ánchekorhetesti k’umanchekua jurhentperakueri Escuela Nacional de Estudios Superiores, Morelia UNAM anapu, istu imeri káskukuecha, k’uiripuecha ka axájtakua enka Petatsekuarhu jaka, materu Laboratorio Nacional de Material Orales UNAM anapu, ka ístu k’umanchekuecha juramukueri ka jurhentperakueri enkaksï kúparhakupka íni ánchekorhetarhu, karantani, mánharhitani pirekua ka kústakua, Consejo Nacional de Ciencia y Tecnología (CONACyT) jarhojpesti, imani p’imarhperata jimpo enka jakankurhipka “Elaboración de propuesta de proyectos de investigación e incidencia que contribuyan a la producción, protección, reconocimiento y resignificación de las memorias y la diversidad cultural y biocultural en México” enka jaka 318871 míiukata ánchekorheta káskukuarhu.

Pirekua ka kústakua, karantskata ka mánharhikata
Pirekua karantskata ka mánharhitakata uánekua k’uiripu jarhojpesti: (kústaticha, pirericha, ka enkaksï inteni ampe kámajka ánchekorheni) enkajtsïni jarhoataka michoacani anapu kústati ka pirerichani p’urhempeani uápuru iretecharhu ísï. Sési ánchekorheparini kústati ka pirericha jinkunichi tánkorhentaska uantaxeni, ka kústakua ka pirekua uapuru iretecharhuchi Michoakani anapu úskachi mánharhitani: Tsakapentu, japuntarhu, juátarhu, ka eraxamani ísï. 15 ka sáni jukari ústiksï tánkorhentani, ka jima uantaxenhasti kústakueri ampe, kústati ka pirerichaksï jima uantasti imecheri jurhentkua, na enkaksï irekorheni jaka kuskatakueri ampe kámaparini. Pirekua ka kústakueri ixu patsarakuarhu xarhatanhaati.

Jurhenkorhekua
“ Enkachi úka nirani kústati ka pirericha p’urhempeani imecheri iretecharhu, kánekua uantanheata ka uétarhenchakua jarhasti, eska kánekua sésiska patsani mánharhitakata pirekua ka kústakua p’urheecheri. Jimpoka pirekuarhu jarhaska iámu p’urhecheri p’ikuarherakuecha. Ka pireparini ka kústaparini nanaka ka tatakecha xarhatasïnti imecheri sési p’ikuarhekua p’urheeni, ka patsatani xáni sési ampe enka tuo anapu jurajkuka ka pireparini ka kústaparini xarharasïnti ireta p’urhepechecha eskaksï nótki k’amantesïnka”

“Kústakua ka pirekua p’urheecheri no imájkuesti enka ma p’arhakpeni anapuecha patsatajka, p’urhecheri ampakiti jatsikorhekuesti enka iretarhu anapueka ka enka iretarhu marhuaka, kústati ka pireri úntsti ma, no ma parhakpeni anapuecha úkuntasïnti, ima ireta anapuecha eratseparini pirekua ka kústakua uantasïnti, imeri p’ikuarhenhekua nanakani o tatakani xáni xénchani. Kustaparini ka pireparini ma jasïsti p’ikuarhekua uénhekorheni.” “Na enkachi p’ikuarheraka ka exeni enkachi nika kústati ka pirericha p’urhempeani, uánekua ampechi exeska eska k’uanixaka: méni sóntku jatini tánkorheni jarhani sánteru jurhenkorheni, arhijtsïkperata ka jarhojperata eska úaka karakata jimpo pakarani ne enka pirekua o kústakua úntaka eska na arhijka juramukuarhu, ka eska máruteru nani isï mítenhaaka pirekua ka kústakua, ka no karantsticha ka iretarhu anapuechajku míteni.”

Ampe enka juramukua arhijka
I ánchekorheta Consejo Nacional de Ciencia y Tecnología jarhojperata jimpo ánchetanhasti, imani p’imarhperakua jimpo Programa Nacional Estratégicos, 318871 míiukua jimpo, ánchekorheteri jakankurhikua “Centro de Documentación, Digitalización y Conservación de la Pirekua Michoacana, Fonoteca de la Música Tradicional Purhépecha”. I kústakua ka pirekua patsarakua únhasti eska patsatanhaaka, etsakunhaaka, p’urheecheri xáni ampakiti jatsikorhekua ka no tumina antarakuesti, eska na karakata jaka juramukuarhu enka mántani uapatsekuarhu arhijka.